भाजपच्या राष्ट्रीय अध्यक्षपदाची निवडणूक प्रक्रिया मार्चच्या पहिल्या आठवड्यात सुरू होणार आहे. होळीपूर्वी, म्हणजेच 14 मार्चपर्यंत पक्षाला नवीन राष्ट्रीय अध्यक्ष मिळणार आहे. यंदा दक्षिण भारतातील नेत्याच्या नावावर एकमत होण्याची शक्यता वर्तवली जात आहे, कारण पक्षाचे लक्ष आता दक्षिणेकडील राज्यांवर केंद्रित आहे.
प्रदेशाध्यक्षांच्या निवडीसह राष्ट्रीय अध्यक्षांची निवडणूक
फेब्रुवारी अखेरीस 18 राज्यांच्या प्रदेशाध्यक्षांच्या निवडीची प्रक्रिया पूर्ण झाली की राष्ट्रीय अध्यक्ष निवडणुकीचा कार्यक्रम जाहीर केला जाणार आहे. भाजपच्या संविधानानुसार, देशातील किमान अर्ध्या राज्यांच्या प्रदेशाध्यक्षांची निवड झाल्यानंतरच राष्ट्रीय अध्यक्षांची निवडणूक होऊ शकते.
नड्डा यांना संधी की नवीन नेतृत्व?
पक्षातील एका वरिष्ठ नेत्याच्या मते, सध्याचे राष्ट्रीय अध्यक्ष जेपी नड्डा यांना आणखी एक कार्यकाळ देण्याऐवजी नवीन नेतृत्वाला संधी देण्याचा विचार सुरू आहे. भाजपच्या नियमांनुसार सलग दोन वेळा अध्यक्षपदासाठी निवड होऊ शकते, मात्र नड्डा यांनी ही जबाबदारी नव्या व्यक्तीकडे सोपवण्याची तयारी दाखवली असल्याची चर्चा आहे.
दक्षिण भारतातून अध्यक्षपदासाठी नाव चर्चेत
गेल्या 20 वर्षांत दक्षिण भारतातून कोणीही भाजपचे राष्ट्रीय अध्यक्ष झालेले नाही. 2002 ते 2004 दरम्यान व्यंकय्या नायडू (आंध्र प्रदेश) हे शेवटचे दक्षिण भारतीय अध्यक्ष होते. आरएसएस आणि त्याच्या संलग्न संघटनांसोबत यासंदर्भात चर्चा झाल्याचेही समजते.
नवीन अध्यक्ष 2029 लोकसभा निवडणूक लढवणार
नवीन अध्यक्षांचा कार्यकाळ 3 वर्षांचा असून, जानेवारी 2028 मध्ये संपणार आहे. मात्र, 2029 लोकसभा निवडणूक त्यांच्या नेतृत्वाखाली लढवली जाणार असल्याने हा कार्यकाळ वाढवला जाण्याची शक्यता आहे.
निवडणूक बिनविरोध होण्याची परंपरा कायम
आत्तापर्यंत भाजपमध्ये राष्ट्रीय अध्यक्षांची निवडणूक बिनविरोध पार पडली आहे. 2013 मध्ये नितीन गडकरी यांच्या पुनर्नियुक्तीवेळी यशवंत सिन्हा यांनी उमेदवारी अर्ज दाखल करत गोंधळ निर्माण केला होता. मात्र, गडकरींनी माघार घेतल्यानंतर राजनाथ सिंह यांची निवड झाली होती. यंदाही अशीच बिनविरोध निवड होण्याची शक्यता आहे.